Celukane Togog. Asline jenenge Mulyono. Merga kenek penyakit ora waras-waras njur diganti undangane. Jarene kaboten jeneng, merga Mulyono kuwi bleger pawakan gedhe dhuwur rupa bagus. Diganti tenger Togog ngemperi tokoh wayang sing cangkeme njeber amba, endhase gedhe. Nek ndhuk pewayangan Togog kuwi asline dewa bagus. Kenek pasot Sang Hyang Wenang Bethara Guru njur dadi batur pawakan cebol, matane ketok gedhe mlolong, tutuk amba dawa kaya cangkem naga.
Ujug-ujug viral, merga gambare mbanjiri jagat media sosial. Ogak nyebar nasional. Nggur trending ndhuk desane dhewe, tapi suwe-suwe jembar tebane. Nyebar tekan ngendi-endi. Gara-garane, dagangane kursi ceklek wektu dijajal pembeli sing arep tuku.Ogak sengaja meneng meneng saka kadohan enek sing ngrekam. Divideo kanthi cetha. Nganggo gadget. Durasine sakjane ogak panjang. Kurang saka sakmenit. Terus meneng-meneng eneng sicok sing diaplod ndhuk platform media sosial. Malah ogak muk sicok, tapi maneka jinis. Enek sing ngunggah ndhuk Tiktok. Liyane diaplod ndhuk YouTube.
Usaha mebel sing ditekuni Togog wiwit ijek status legan. Urip dhewekan. Sakjane nggone dodolan ugung ngantek gedhe nemen. Nanging lumintu kenek nggo adeg kendhil. Isa ngliwet bebasane. Kenek nggo srana adang. Sing penting pelanggan setyane ndlidir. Mbanyu mili. Ogak mung rog-rog asem.
Kadhang Togog ya sambat nguwuh. Kok usahane ogak godag mundhak gedhe. Nggur pancet ngono-ngono wae. Kamangka maneka cara wis diikhtiyari. Setiyar adreng mrana mrene. Tetep wae ogak godag berkembang. Pancet kaya sekawit. Ogak eneng perubahan mirunggan.
Mula Togog njur asring nglamun kambi mbatin, apa sebabe kok usahane adol mebel ogak isa laris?. Akeh pitakon sing ngebeki pikiran. Nek terus ogak eneng owah-owahan, njur kapan isane dadi konglomerat kaya sedyane kawit cilik. Ogak kumbi, panncen cita-citane nunggak semi karo penggaotan wong tuwane.Tapi dheweke suthik adeg toko mebeler persis niru bapake sing ogak kreatif nir inovatif. Togog kepengin usahane melu nylarasake perkembangan jaman. Ogak gelem cara konvensional sing jadhul. Kudu slaras karo selerane wong urip jaman sakiki.
Usaha mebeler kuwi ndhisik didadekna pralambang utawa pralampita. Tandha pasemon mligi kanggo dheweke. Lire, dadi kiasan dodolan kursi kanggo njungok dilunggohi wong. Sapa eroh mbesuke dheweke isa nglunggohi jabatan ambak mung cilik-cilikan. Kayadene ketua er-te, ketua er-we anjog kursi lurah. Sokur-sokur luweh dhukur maneh kaya bupati ngantek jejering jabatan presiden.
Togog sedhih eling jenenge viral merga kursi produk CV Usaha Raja duweke dadi kucem. Jalaran kabar elek sing nyebar adoh. Jaman digital, arepa kabar cilik saka ndesa tetep isa mbiwara tekan manca. Rerasan miring mbrubul ndhuk jagat medsos.Didelok wong sak ndonya Ngantek enek sing menghujat ogak mekakat. Diundamana nek kabeh mau usaha abal-abal.Nggur modhus penipuan. Usaha dodolan ambek cara apus-apus, kualitas ogak pakra. Nanging regane njala angkasa.
Luwih-luwih dheweke sakiki ogak nggur jejer pengusaha mebel wae, nanging wis cekel jabatan kepala desa sing disungkani. Penggedhe ndhuk level desa, nanging wis kasdu dadi pengusaha kondhang sing pesugihane mbruwah tekan ngendi-endi. Ogak nggur saindhenging kecamatan kiwa tengen. Nanging wus anjrah tekan level nasional, malah wiwit ngambah jagat internasional.
Nadyan mbiyen anggone kontestasi macung lurah nganggo cara sing ogak lumrah. Kanthi strategi curang mawa cara serangan pajar. Apa maneh dheweke uga nduwe ambisi nek periodene wis entek, salah sicok anake lanang arep dielokne mancung pilkades nggenteni dheweke.
Idhep-idhep ndadak cekekal tangi saka ngimpi. Gragapan jebul apa sing nabet lamulnane maeng nggur ngimpi. Dudu kanyatan sing nembe linakonan kanthi temenan. Nanging nek dirasa-rasa memper kaya apa sing lagek digagas ambek diangkas-angkas njero pikiran.
Mula njur pengangene miber adoh. Kelingan rolas taun kepungkur nalika daya-daya pamit bojone wedok. Ngenani kekarepane sing kepengin melok mancung pilkades ndhuk desane. Ada-ada sing klebu aeng kanggone Salindri bojone wedok. Mula nalika iku sisihane durung ikhlas ngekeki pasarujukan. Sing wedok tau elik-elik.
“Pak! rebutan lurah kuwi jabatan politik. Kudu gedhe bandhane, ogak mung angger wae. Akeh mungsuhe. Ogak sethithik pambengane Mbok rasah melok-melok nuruti ambisi sing durung mesthi kasil. Njajal dipikir meneh. Digelar digulung untung rugine. Nggedhekne usaha mebeler tak kira luwih becik'” semantane bojo wedok nanggapi.
“Tapi nek mung nunggoni usaha mebeler wae angel gedhene dodolan. Engko nek disambi cekel jabatan lurah, aku yakin isa ngembangake usaha ambek golek proyek.” argumentasine Togog ndhuk Salindri.
“Lho kuwi berarti nganggo dalan kolusi,Pak? Ngenggokake anggaran nganggo dalan sidhatan,” Bojone wedok tambah santak olehe jengkeran.
“Saiki ndi eneng wong usaha nganggo dalan lurus. Ogak eneng wong dagang cepet gedhe nek ogak nganggo dalan pintas Dhik?” Togog ngeyel.
“Ya wis,Pak. Nek karepe sampeyan adreng ogak kenek dipenggak. Aku ogak melu tanggung jawab nek eneng apa-apane. Kabeh resiko sampeyan tanggung dhewe. Aku emoh ngrewangi” Salindri mutung.
“Aja ngono ta, Dhik? Iki kabeh kanggo kebahagiaane awak dhewe ambek bocah-bocah. Ngowahi nasib kareben ogak mung pijer susah kaya ngene. Nek gak eneng usaha, kapan isane ngrubah nasib?” Pitakone Togog kambi ngrayu sing wedok.
“Terserah! Mboyak,Pak. Aku raurus. Nek sampeyan tetep ngeyel budhala.Tapi nganggo dalan sing becik. Eling wong becik ketitik ala ketara. Sapa nandur bakal ngundhuh. Sapa salah bakal seleh” sabawane Salindri terus klepat ngalih ngenggon.
Tembunge Salindri sing dirungu luwih saka rolas taun kepungkur kuwi dumeling maneh. ‘Sapa salah bakal seleh’.Dipikir jero, digelar digulung. Pepuntone dheweke mbuwang tembung sing isa dianggep nyrimpung ambisine. Panyaruwe bojo ora digape. Tetep mancung ngantek dadi lurah ing desane nganti sakiki. Ambisi sijine maneh penginnglungguhake anake lanang njabat kades nggenteni jabatan sing ijek diregem dheweke. Kabeh isa gagar wigar, ambyar.
Kekarepane Togog anggone pengin nglungguhake anak-anake ing kursi pejabat ogak tau mati. Pindha geni sing terus mangalat. Dheweke ogak pengin pension, dadi rakyat biasa. Emoh dadi wong lumrah. Tekade kuwat ogak nglokro. Suthik putus asa. Nyengguh piye isane tetep nduwe pengaruh satengahe masyarakat. Pijer gawe rekayasa isane kasembadan kabeh kekarepan. Nek kongsi periodene wis entek ambek ogak isa didawakne maneh, kudu eneng acara liya kanggo ngawekani.
Mula anggere anek pelanggan utawa rekanan teka terus gage diajak komunikasi. Anggere ana kontes utawa pameran meja kursi mesthi dieloni. Arepa panggonane adoh ndhuk njaban dhaerah. Arepa ndhuk njaban propinsi tetep ditekani. Mulane ogak mokal nek kenalane para pejabat penggedhe selot akeh. Pejabat dhaerah tumekeng nasional. Mula kolegane para pengusaha terus tambah. Tansaya mundhak saandhug gunggunge.
Lerege banjur salah siji anake lanang aran Kacung dilebokake dadi pengurus salah siji parte. Partai gedhe duweke kenalan. Kareben ngangsu kawruh ndhuk babagan politik. Canthuk lawung kambi theg kliwere ngemonah organisasi. Kepiye alang ujure nggedhekake parte. Sing dipilih ogak angger parte. Tapi milih parte sing wis dikemonah cara modern. Ujare partene cah nom-nom generasi Z.
Kabeh maeng mung nyuprih kepiye anake lanang sicoke jeneng Bahlul isa melok kontestasi nadyan umure ugung cukup.
Jabatane Jokotog periode kapindho nyedhaki rampung. Ogak isa melok mancung maneh. Be-pe-de, perangkat desa, tokoh masyarakat, tokoh agama padha kumpul ngrembug estafet kepemimpinan. Slaras karo aturan gumathok, wis wancine ngadani pilihan kepala desa. Milih lurah anyar kanggo cekel pemerintahan periodhe sabanjure.
Mula gelis ngrancang kepanitiaan pilkades. Pawongane saka maneka unsur. Wiwit be-pe-de, tokoh agama ngantek tokoh masyarakat. Gelis nyusun aturan tatacara lan persyaratan kanggone calon sing ape mancung melok kontestasi. Nadyan kanthi sru adu argumentasi ambal-ambalan, sidane klakon dadi keputusan.
Bareng ngrembug persaratan umur slawe taun, aneng sing usul batas umur diendhekake sekawit paling endhek slawe tahun dadi telulikur taun. Rapat umyeg rame dhebat kusir ora rampung bar. Banjur lurah Togog usul apike dirembug panitia tartamtu wae. Kabeh manut. Witekna sing padha teka wong-wonge Togog. Wis diatur sakdurunge rapat. Ana dramaturgi sing disutradarai. Beda halaman ngarep,beda plataran mburi. Kongkalikong,pidak jempol.
Ndhuk ngomah Togog nuturi anake loro aran Kacung lan Samsul. Khusus kanggo Samsul, wola-wali diwanti-wanti ogak usah ngomong apa-apa ambek masyarakat. Apa maneh nek diwawancarai jurnalis. Wartawan apa wae ogak ditanggapi. Kuwatir salah omong dadi blunder. Dasar Samsul dhewe ogak pati godag omong. Diplomasine ijek urung mumpuni. Nanging pinter omong kanggo ngenyek liyan.Ngala ala sapa ae. Ning alam nyata apadene ning jagat digital. Ngamping-amping suwalike akun abal-abal.
Nyandhak rapat panitia sabanjure swasana dadi panas. Sawat-sawatan tembung atos. Adu argumentasi mirunggan ngenani persaratan batas umur peserta kontestasi. Botohe lurah inkamben versus kontra masyarakat umum. Nanging kanggone Togog ogak eneng bab sing tanpa solusi. Kabeh aturan kenek direkayasa. Disiasati kana kene nganggo celah sing eneng. Klebu dedreg udreg perkara batasan umur minimal kanggo kesdu mancung lurah.
Sakbare rapat panas, pepunthone sarat umur didhunake saka slawe dadi telulikur taun. Samsul sing mesthine ogak isa melok kontestasi malih dadi lolos persyaratane. Ogak perduli nrabas aturan batas minimal.Sing penting kabeh ambisi isa dipinangkani. Cita-citane kepengin tetep cekel pengaruh antuk dalan kanggo ngawekani. Bareng kabeh kasembadan, esuk sore Togog mesam-mesem tandha atine kalegan ngrasa sengsem karo ngelus-elus janggute.
Pepuntone, opini negatif ngenani akal-akalan batas minimal mancung kades rame saktengahe masyarakat. Cawe-cawene Togog wis cetha dikaweruhi dening warga masyarakat. Ambak wong-wong desa ogak damang masalah politik, nanging kabeh paham akal buluse Togog. Omonge mencla mencle, ora kenek digugu. Esuk dhele,sore tempe. Eneng sing madani, ibarat wong numpak kendharaan. Ngreting nganan, menggok ngiwa.
Enek sing misuh-misuh ambek menghujat sakenggon-enggon. Ndhuk gerdhu ambek warung-warung. Ndhuk forum tahlilan uga pengajian. Malah swara umyeg rame dadi rerasan tekan donyaning medsos. Nanging kabeh ogak dipaelu dening Togog. Dianggep angin lalu. Mengko suwe-suwe rak meneng dhewe. Seiring lumakune wektu. Cekake, kabeh maeng dipetung entheng wae, bebasan anjing menggonggong kafilah tetap berlalu.
Sidane tahapan pilkades ndhuk desa Langit Mendhung sida digelar. Tahapan tahapan wis dileksanani. Samsul antuk undian nomer loro. Mungsuhe wedok aran Gendari cekel nomor siji. Tumekeng acara kampanye, visi-misi calon diadani ndhuk bale desa. Penonton tumpleg blek ngebaki bale desa. Nadyan wis dibatesi jumlah pendukung sing antuk nekani. Suprandene Togog wis njarag ogak ngrewes. Kepara ngompori pendukunge supaya nggrudug nggon lokasi kampanye. Panitia wis ngelikake penonton pendukung kudu ngadoh saka lokasi. Kabeh ogak eneng sing maelu. Panitia ape meksa ogak wani. Wedi nek dimassa wong akeh.
Para botoh penyengkuyung sing teka padha manther mandeng panggung debat. Moderator saka panitia pilkades ngundang calon munggah panggung podium. Papan mligi sing wis ditata manut aturan sing eneng. Antusiasme masyarakat gedhe banget ngeloni nyemak isine kampanye. Ngrungokake janji-janji sing dibabarake ambek para calon.
Gendari sing pancen ayu, nomor urut siji kanthi runtut ngandharake visi misi. Apa-apa sing abe ditindakake nem tahun mangsa pengabdiane. Kabeh dimensi panguripan warga arep diseriusi. Kabeh lapisan masyarakat wiwit petani, buruh, pedagang engga tokoh agama bakal diopeni. Rampung orasi kampanye tepuk tangan gemuruh penonton ambata rubuh.
Genti Samsul sing antuk giliran ngandharake visi misi. Suwe olehe ngadeg ogak ndang omong. Njur idhep-idhep nembang shalawat sedhilut terus nyanyi ndhangdut karo njoget-ngoget. Penonton pendhukung umyek rame. Akeh-akehe padha kaget kampanye kok nggur sholawatan, Nyanyi njur njoget-njoget. Panitia nyandhet Samsul sing lagek kampanye nganggo njoget. Nanging dheweke ogak nggatek, terus umak umik ambek nganggo gerak pantomim. Dipungkasi kambi ngomong: “Nek nomer loro menang kabeh dijak sholawatan, ndhangdutan, mbangun cafe gedhen-gedhenan.”
Bubar dhebat kabeh wong padha mlenggong. Sawang-sawangan gumun. Ogak nyana, ogak ngira nek Samsul gawe gimmik ndhuk ndhuwur panggung.
Penonton padha buyar njur ngunclug mlaku mulih. Padha gemrenggeng pathing greneng ngrasa kuciwa
“Calon edan?!” swarane pendhukung nomer siji.
“Samsal songong????!!!!” pendhukung kontra liyane.
“Joget dhangdutan asyik?” sorak botohe Samsul karo njoget tengah ndalan.
“Ajur blimbing sayur!!!” bengokan saka kadohan.
“Nomer loro koplak ugal-ugalan!?”
Swara alok nyaruwe ambal-ambalan. Gemrudug rame sakdalan-dalan. Ogak eneng sing nglarang. Aparat keamanan nggur trima nyawang, emoh cawe-cawe.
Togog sing awal nganti akhir melu ndelok acara, nggur sedhakep karo mesam mesem. Ndelok tingkah polahe wong. Gelis nyedhaki Samsul dipuk-puk pundhake. Ayem wae jer dheweke wis gawe skenario julig. Cawe-cawe andum bansos sak akeh-akehe. Mesthi menange. Terus ngrekayasa dramaturgi ndhuk panggung kontestasi nadyan ngrusak konstitusi.
Jokotog mlengeh ngguyu kalegan atine. Karo udut kebal kebul ndhuwur kursi empuk. Terus ngelus janggute karo ngetung etung strategi julige.
Cuthel
_________________
*)Nono Warnono, Ketua Pamarsudi Sastra Jawi Bojonegoro (PSJB)
